精神病人「練功」係好常見嘅情況，佢哋因為有妄想或被害型精神分裂症，以為自己會被害而諗出一啲獨門方法嚟保護自己，但有病人練功「走火入魔」，有個年輕精神科病人，聲稱閉氣練功修補被偷走嘅心臟，因閉氣太長時間，搞到雙眼結膜下出血，真正谷到爆血管。

稱護士偷心要修補

呢宗「練功」奇案登咗喺最新一期《香港醫學雜誌》，病人24歲，以為有人落毒害佢，又以為護士偷咗佢個心，所以要修補番個心，用雙手壓住自己個胸然後閉氣「練功」，閉得幾耐得幾耐，後來護士發現佢雙眼結膜出血，醫生相信應該係閉氣令眼內壓升高，令結膜下出血，好彩無損視力。
精神科專科醫生李德誠話，有妄想嘅病人好多時以為被人跟蹤、毒害，會諗啲方法保護自己，練吓啲「自衞術」，一般無傷大雅，極端情況變成自殘。佢話最典型傷害自己嘅係以為自己雙眼俾人裝咗閉路電視，為免自己行蹤洩露，外國有例子係病人自挖眼珠，香港無咁血腥，有病人用膠紙貼眼。佢話呢啲妄想症可食藥同透過認知治療改善。