正喺泰國遊埠嘅葉劉，噚日喺佢facebook一改話題講宗教，話祭祖不單係儀式，亦都係教育，希望祭祖能化解社會紛爭，實現家庭和諧、政通人和，仲話自己早前出席過「祭祖大典」，特別指出活動同場有孔教學院院長湯恩佳㖭。
葉劉呢股突如其來「宗教熱」，所為何事？唔少政界花生話呀，葉劉對下屆特首寶座虎視眈眈，𠵱家距離下屆選舉尚有不足30個月，如果要參選、要攞支持嘅話，真係差唔多時候要出招。而佢今次揀宗教界埋手，唔通係睇住梁振英嘅弱點出擊？

睇住選委名單交朋友

相信心水清嘅人士都記得，梁振英喺十月時多口批評宗教界、體育界冇經濟貢獻，辣㷫兩界別人士高調反擊，搞到梁振英要澄清補鑊。查實宗教界喺特首選舉委員會有60席，六大宗教每各佔10席，份量絕對唔輕。
《蘋果》記者幾個月前向孔教學院院長湯恩佳回應梁振英話宗教界「經濟零貢獻」言論時，湯恩佳隔咗三日回應：「孔夫子有云：『和為貴』、『求同存異』。閣下提問之問題，甚為敏感，本院不便回答，不便之處，敬請原諒！」孔教有冇嬲咗梁振英？大家心照不宣。
花生友覺得係，喺盛傳提委會「完全抄照」2012年特首選委會情況下，有意選特首嘅人，睇住2012年嘅選委會千人名單「廣交朋友」，都係明智之舉吖！

花生友