羽毛球世錦賽周三繼續在蘇格蘭的格拉斯哥舉行，馬來西亞球手李宗偉周二已經首圈出局，而中國球手林丹今日就會在次圈對賀斯特。

相信好多球迷都希望今屆羽毛球世錦賽可以出現「林李大戰」，但點知李宗偉唔生性，首圈就爆大冷出局，以1:2不敵世界排名31位嘅法國球手利華迪斯。李宗偉職業生涯只係贏過三次世錦賽銀牌，未拎過冠軍，諗住今屆可以彌補遺憾啦，點知衰多兩錢重，仲刷新個人10次參加世錦賽嘅最差成績。34歲嘅李宗偉話：「覺得自己特別差，跟唔上節奏，好多球都好被動。已經盡咗最大努力，但都係輸咗。遺憾肯定有，但冇辦法，始終要去面對。」被問到幾時掛拍，李宗偉都係一如以往咁話：「我唔知道。」至於李宗偉嘅宿敵、中國球手林丹就順利晉級次圈，在英國時間今日下午對丹麥球手賀斯特。

多名香港球手亦會在周三出戰，如葉姵延出戰女單次圈對三號種籽的馬蓮，九號種籽「香港一哥」伍家朗就會在男單次圈對意大利的馬達隆尼，另一名港將黃永棋就遇上日本的常山幹太。另外，吳芷柔/楊雅婷及潘樂恩/謝影雪會出戰女雙，而柯展聰/鄧俊文就繼續參加男雙。