韓國男團BIGBANG隊長G-DRAGON（GD），上月來港開騷後，今日再次襲港，出席代言品牌嘅見面會。GD現身活動前先接受傳媒訪問，不過GD就遲咗35分鐘先現身。

下午3時5分左右，GD以一身紅黑造型現身，先大擺甫士影相之後回答傳媒提問。GD表示好榮幸可以擔任品牌代言人，而且好開心可以再來港。

GD話佢一直都break the rules，問到邊隻顏色最適合用嚟形容「權志龍」(GD本名)，GD表示佢一直都對髮型造型好有興趣，每次都會配合返首歌嚟轉造型，而且作為歌手要不停轉變，因此目前未知咩色最適合自己。GD表示由佢加入YG開始，一直都係跟同一名髮型師合作，完場前更向大家介紹佢嘅髮型師。

GD現身見傳媒7分鐘左右就離開，之後現身見面會見粉絲。下午3時30分GD一出場即表示好開心見到大家，然後抽出幸運粉絲，回答佢哋嘅問題。GD表示今年內又要做世巡又要出碟，坦言都覺得係有負擔嘅。

GD又提到點解對「break the rules」呢句話有深刻感受，表示：「BIGBANG每個成員都鍾意挑戰新事物，跟住規矩就會非常冇趣。」

上月29歲生日嘅GD，表示自己都好期待30歲嘅自己會係點。當被問到有咩fashion貼士時，GD：「要有自信，唔好理人點睇，自己覺得舒服就好。」之後GD行近台邊親近粉絲，及跟上台嘅幸運粉絲大合照。完場前4名粉絲作為代表上台送禮物，GD勁親民地握手及送抱，其中一名粉絲送咗幅畫畀GD，GD即鬼馬地擺返個甫士。最後，GD跟全場過千粉絲影大合照，現身40分鐘即離開。