年過40嘅名媛榮文蔚貴為坐擁百億身家嘅中信泰富主席榮智健姪女，平日挽個名牌袋都萬萬聲，早排又話同老公阮偉文花費六位數字，包起跑馬地Amigo餐廳慶祝結婚10周年，相當富貴，但點都估唔到佢嘅價值觀都好彈性，早幾日佢喺銅鑼灣單拖shopping，逛嘅並唔係名店，而係做緊五折起大清貨嘅JDC女裝boutique。
當晚8點零鐘，戴黑超嘅榮文蔚身穿低胸tubedress，全身上下顏色襯到絕一絕，喺時裝店內細心揀太陽眼鏡同吊帶衫，由於店舖正值大減價，所以全場迫滿OL，不過榮文蔚為揀平貨，姑且丟低榮家淑女風範，一於人摷我摷，結果揀中條吊帶連身裙，埋單398蚊，真係抵！

榮文蔚呢頭買完，嗰頭又殺出個商天娥，41歲嘅肥娥雖則雲英未嫁，但呢排唔知係咪因忙緊拍電視劇《師奶兵團》入戲得滯，搞到好有師奶feel，一入舖頭就好熟手咁向衫堆掹、摷、攞，試完衫又試頸鏈，弊在試完一輪都係搞搞震，冇幫襯。
本來榮文蔚同肥娥可以話係大纜都扯唔埋，但關仁覺得佢哋都有共通點，就係鍾意執平貨囉！
Textby關仁