記得80年代中國響遍鄧麗君嘅靡靡之音，遺憾嘅係小鄧從未喺內地開過演唱會。其實早喺87年左右，內地邀請過小鄧北上演出，點知後嚟發生八九民運，當年小鄧掛上「反對軍管」紙牌參與「民主歌聲獻中華」，聲援學生，仲話明中國一日冇民主，一日都唔會踏足內地，令演唱無期，點知95年5月8號小鄧哮喘猝逝，始終達唔到心願。

紀秋鈴獻聲

今年係小鄧逝世14周年，為咗完成小鄧唱遍大江南北嘅心願，鄧麗君文教基金會搞咗個「10億個掌聲15年輪迴──永遠的鄧麗君經典金曲音樂會」，由下月18號開始，喺內地多個城市巡迴演出，首站係北京，之後有瀋陽、大連同哈爾濱等，仲搵咗有「小鄧麗君」之稱嘅四川歌手紀秋鈴演唱小鄧名曲，佢仲會同鄧麗君隔住時空對唱《我只在乎你》，屆時大會又會播放小鄧一啲從未曝光嘅片段，彌足珍貴。
至於負責獻聲嘅紀秋鈴，原來係由同小鄧合作無間嘅台灣著名填詞人莊奴一手發掘，小鄧嘅胞弟鄧長禧第一次聽到紀秋鈴把聲時更激動到喊，三哥鄧長富都大讚話：「秋鈴小姐和鄧麗君的聲音乍聽確實有些像，我也很高興看到能有人跟她的聲音這麼接近。」屆時紀秋鈴仲會着番小鄧嘅服裝上台，雖然小鄧已歿，但聲色猶在。