當年今日

  重情小小超感謝張永霖 - 李八方

蘋果日報 2003/05/17 00:00


張永霖(Linus)年底離開八號仔,唔再擔任電訊盈科嘅副主席,所謂功成身退,天下無不散之筵席,Linus自己覺得冇乜大不了,反正以佢老哥嘅經驗,唔難搵到高位落腳,當然有冇小小超李澤楷咁慷慨嘅老細就好難講。
話說回來,原來小小超一直都感謝張永霖當年幫盈科數碼動力成功收購咗香港電訊,如果唔係多得佢,嚿肥肉已經成為新加坡電訊李顯揚囊中之物。小小超咁念舊情,所以一直無虧待呢位前朝重臣,更唔希望見到有人話佢唔滿意Linus嘅表現。

蘇澤光腳頭好
至於地鐵蘇澤光,聽講已經喺高人引薦下同澤楷仔傾得七七八八,只係差一紙聘書未簽,JackSo咁好腳頭,一話加盟,八號仔嘅股價就升,真係唔恨得咁多。
小小超出名鍾意盡收天下兵器,不計成本,《信報》曹公消息果然靈通,末代港督肥彭當年嘅首席智囊,人稱「魔僧」嘅顧汝德Goodstadt最近做咗電盈顧問,係咪乾收銀唔做嘢就未知,但魔僧當年喺政府搞到班高官好㷫就十分出名。鬼叫肥彭信佢,本施政報告由佢起草,班高官唔高興都冇符。


傳真︰2623-9278
電郵︰[email protected]