香港第一代兒童節目主持「加明叔叔」王曦，上月28日因病逝世，享年94歲（新聞連結： http://bit.ly/2xEyDo2 ）。今日在中環聖公會聖保羅堂舉行安息禮拜，曾鈺成都有來致祭，至於何韻詩同父母及哥哥、港台、以及一眾親朋好友學生亦有致送花圈。

今日上午10點，加明叔叔的兒子兼兒童節目主持「Harry哥哥」王家怡（又名：王者匡）、太太一丸綾子、大仔王致仁、二女王祖兒同細仔王勇二早已到場打點，見他們與親友在堂內綵排，心情平靜。Harry哥哥見到傳媒後，禮貌地表示：「有心，有心。」

由於Harry哥哥忙着打點，所以派出其徒弟Anjo接受訪問，他表示加明叔叔一家都是基督徒，故舉行安息禮拜，並由鄺廣傑榮休大主教主持，之後靈柩移送哥連臣角火葬場火化。

Anjo表示：「儀式上有段係家人親友講說話，不過Harry同太太、囝囝會以音樂分享去紀念爺爺（加明叔叔）。」Anjo又指Harry哥哥一家人心情開懷，每日都會預備今日的流程，準備細節。

Anjo續稱：「佢哋全家人都好快樂，好平安，一定係唔捨得，但始終爺爺都94歲，佢哋都有心理準備。」加明叔叔有無說話留低給子女？Anjo表示：「王老師嘅太太搵到佢親手寫嘅書信，o依家搵吓一張，搵吓又一張，其實佢臨離開之前，有提過Harry慢慢會搵到佢啲嘢，所以我估陸陸續續搵到更多，老人家有好多秘密，係兩仔爺之間嘅寄語，愛護嘅說話。」

講到曾經陪伴加明叔叔出鏡的布偶會否被選為陪葬品？Anjo表示：「好似唔會，因為今年年初香港歷史博物館曾經訪問過佢，佢將布公仔、奬座、手稿都捐出嚟，讓後世嘅人睇到；而且Harry嘅妹妹親手畫咗張樹畫，大家喺上面簽名，然後同爺爺一齊火化。」

安息禮拜結束後，加明叔叔靈柩由孫兒王致仁及其他扶靈人士推出，再由工作人員抬上靈車；Harry就同媽媽、太太及子女於堂外向所有親友道謝，見他們心情輕鬆，同親友有講有笑，然後他們就前往哥連臣角火葬場。