地鐵（066）今年4月大發神威，但眨吓眼冇晒聲氣，上周五報19.56元，跌14仙。呢兩個月大市係咁升，佢郁都唔郁吓，捧場客點算好？
喺「香港討論區」內，trick01向網友求救：「之前高位$20入貨後狂跌，短期有冇機重上$20？」外星使者有高見：「嘩！地鐵咁識做生意，同政府攞完又攞又唔減價，使乜驚呀？」692931就堅持：「死都唔好放，長升長有。」
地鐵基本因素良好，買咗唔驚瞓唔着，但睇完張圖，直頭可以悶到你瞓着。隻股今年4月升到21.50元後造咗個大圓底，正常嚟講，喺圖表上，短時間內再造支柄，就可以向上再爆，但地鐵支柄足足吽咗兩個月都冇料到，圖表派點解釋？

唔怕悶就繼續揸

如果睇番地鐵過去走勢，其實舊年都出現過類似形態，當時個小圓底只係醞釀咗個半月，但個柄就足足造咗3個月至向上爆。今次個大圓底醞釀咗3個月，大家估支柄要造幾耐？
再睇周線圖，隻股喺02年中至04年頭完成大圓底後，造柄又用咗1年多啲至爆上。照咁睇，買地鐵，即使係見到個好完美嘅向上形態，可能揸極都仲係叫緊糊，冇耐性就唔好嘥氣。短期內，相信隻股會繼續喺19至21蚊之間上上落落，唔怕悶嘅可以繼續揸。
余文