劉浩龍（師兄）﹑陳慧敏及亢帥克，今午出席喺東涌舉行嘅「離島區新春嘉年華2015」，師兄打頭陣演唱，不過佢就有啲聲沙，接受訪問時仲叫記者企開少少，話驚傳染畀大家。

師兄表示日前出席完一個羽毛球活動後，發覺唔舒服，咁啱當日出席嘅人，亦先後唔舒服。佢今早本來要錄音，但後來都同舒文講嚟唔到，佢仲喺舒文Instagram見到，原來有四名歌手都病咗錄唔到音。問佢擔唔擔心傳染畀女友容祖兒？師兄就話盡量都唔想惹到人，起身時唔覺把聲咁嚴重，0依家越來越重，呼籲大家要小心啲病菌。

講到近日有報道指佢同祖兒由日本甜蜜返港，師兄喺機場表現冇品，報道話佢上車離開時踢跌記者相機，又話佢陰陰嘴笑，師兄開腔回應：「咁你哋就要做我品格證人，自己有睇過條片，自己出嚟SayHi打招呼嗰條片就Cut咗，不過Saysorry嗰條片喺度。」

佢再解釋：「上車後突然發現腳下有鏡頭，所以就自然反應，自己即刻Saysorry，喺機場出嚟一定預咗有記者，加上係開心事（指旅行返港），唔會咁笨囉，因為受傷害最終都係自己，我經歷呢行咁多日子，冇咁笨啩。」

問到當時反應係咪條件反射？師兄謂：「正常0架喇，自己有打功夫。（話你陰陰笑？）點會呀？我長期都保持一個微笑。」講到女友祖兒做品格證人，問佢係咪開心？師兄話：「梗係要，唯獨得佢喺現場，你哋都要做我品格證人，我唔會咁啦，點會做呢啲低能嘢。」

此外，講到噚晚公司舉行春茗，師兄表示有同老闆周焯華傾偈，講到噚晚不停加碼抽獎？佢話：「係呀，不過自己抽唔中，反而聖誕節抽中兩萬Cash，後來抽唔到嘅人，都有500元利是。（有冇同華嫂傾偈？）都有呀﹗」

而亢帥克及陳慧敏噚晚都有出席春茗，陳慧敏表示抽中咗個喼仔，佢仲話有啲同事抽中十萬現金。亢帥克則指春茗氣氛好好，大家都好開心。問亢帥克有冇留意亞視新聞？佢話冇留意，問佢係咪離開亞視後就再冇留意？佢解釋：「上咗廣州過年，啱啱返港，所以冇留意。」咁係咪佢離開亞視運氣好咗？亢帥克話：「都有少少，知道佢哋有糧出都好開心。」