遇上一個好角色，對演員來說對可遇不可求。

公仔箱中平日看到嘅伍詠薇，你最記得佢乜嘢？睇《香港先生》時嘅急色女觀眾？定係近日熱播合拍劇《飛虎之潛行極戰》嘅聯運「娜姐」？

伍姑娘日前喺深水埗接受《蘋果》訪問，佢話為咗呢個角色，好努力做功課，拍攝前咁啱跌磅，輕咗18磅，變咗「排骨薇」，仲要做黃宗澤阿媽：「最初一聽娜姐呢個角色，有氣場，全套男人戲，得我一個女反派，做大家姐。」咁有發揮，伍姑娘立即扑鎚。

伍姑娘13年離開無綫，點知5年後以外援身份返去，仲執到支好籌：「以前係自己班底先拍到呢啲劇。」當伍姑娘知道對手係夢眛以求嘅苗僑偉（三哥）、張兆輝同吳岱融，全部老戲骨，仲有小生黃宗澤扮演母子，伍姑娘覺得一定好有化學作用：「最開心同前輩級演員平起平坐，大家都好過癮。我同岱融哥拍，真係腳都震埋，怕自己演得唔好。人哋讚你好，好巴閉咩？係對手畀到好嘢你先有化學作用。」

好多演員都認同人生如戲，戲如人生，伍姑娘話自己無時無刻都會練戲：「我好奇心大，對乜都好奇，好鍾意偷人嘢，喺人哋身上偷佢動態行為。」伍姑娘做賊仔係想揣摩角色。

問伍姑娘最想同邊個合作，貪心嘅佢話：「我知同周潤發就遙不可及，唔知點解，我真係諗過好想同郭富城合作，當然四大天王，個個都鍾意，但特別想同城城。」如果同城城合作，係咪可以放棄着高踭鞋？伍姑娘自嘲：「我都唔係好高啫，城城佢跳唱都得，睇住佢一路做戲變遷，好深層次，佢真係舞台王者，佢嗰種勤力。」 如可以合作，姑娘覺得佢哋戲中乜嘢關係？佢話：「我梗係唔介意做佢另一半，那怕係太太或情人，咁城城唔會選擇呢啲，同佢拍警匪片都可以，佢做偵探，我做賊婆，或者雌雄大盜啦。」

伍姑娘話願意為藝術犧牲，佢話：「我已經係中女，唔可能返轉頭拍番後生角色，我40幾歲冇仔女，全程投入演戲，有一團火，只要角色敢用我，我敢做，當然唔係後生角色，到時你唔嘔，我都嘔幾勻。」性感戲？「梗係得，你敢睇，我敢做，床戲？睇下同邊個，林雪都得，劇本緊要，只要劇本好，唔好諗咁多嘢，雪哥唔好介意。」

接性感床戲要向老公練海棠請示嗎？霸氣伍姑娘語出驚人：「邊個老公？『練海狗』下嘛，我覺得海棠哥會畀我演，佢會睇劇本，如果無端端叫我露點，有冇考慮過觀眾感受，係咪回饋社會，我自己都過唔到自己。但係如果劇本合理，海棠哥會支持我嘅，佢敢唔支持我？佢欠我咁多，佢係咪欠我太多啊？海狗哥。」

場地：麵館

精選娛聞，喺晒《娛果》
http://fb.com/appledailyent