在《師奶兵團》中，飾演師奶的商天娥入型入格，她表示寧扮師奶也不願扮貴婦，她說：「我鍾意扮師奶多啲，好似平民開心果咁好得意，今次個師奶造型，我都有加少少意見，想反映低下層嘅生活。」

無名但有利

肥娥自80年代訓練班畢業後，即擔正做花旦，演出《鹿鼎記》和《儂本多情》等劇集，她對此說：「我都覺得好驚喜，當年訓練班同期有劉嘉玲、曾華倩同藍潔瑛，個個都靚過我，我只係睇落順眼啲，可能係當年我喺訓練班中成績係最好嘅原因，以為自己出嚟只可以做性格演員，點知做花旦，我咪當係獎勵囉！」
當年擔正花旦，後期變成配角，肥娥自言沒失望，她說：「我好樂觀，唔會諗得太多，唔通套套都搵你咩？套套搵你先奇怪呀。我承認喺『名』上唔及當年，但『利』就一直都有，我唔會為名而唔開心囉。」
除了花旦變配角外，商天娥也由靚娥變肥娥，原來她的體重曾高達140多磅，她說：「你哋話我肥，咁我係肥呀！我唔會為你哋而減肥囉。我覺得自己嘅身形開始有少少論盡，着衫又唔靚，所以就減，我係為自己而減，其實我太瘦唔靚㗎，因為太瘦我個樣會好惡。」