衛詩雅最近喺內地拍攝新片，日前專程趕返港拍攝彩妝隱形眼鏡廣告，佢笑話由入行開始已經好恨拍隱形眼鏡廣告：「我記得曾經有個男朋友同我講，話我對眼識得講嘢，佢覺得我會去拍電影都係呢個原因。我成日覺得呢樣嘢好特別，加上眼係人嘅靈魂之窗。」

講到喺內地拍電影，佢話：「要拍3個月，拍到下年1月，所以無論生日、聖誕，定係元旦，都要工作中度過，好彩我有劇組、演員，我哋一齊搞party，大家交換禮物，準備聖誕卡，起碼有啲聖誕氣氛。」詩雅自爆一直好恨同男朋友過一個浪漫聖誕節：「聖誕節係好浪漫嘅節日，確實係要同男朋友過嘅。我由細到大都有個幻想畫面，出面落住大雪，係一間木屋入面有好大聖誕樹，我同男朋友係火爐邊一齊睇書。我想過咁樣嘅聖誕，我覺得好靚呀！好似拍緊戲一樣！」

精選娛聞，喺晒《娛果》
http://fb.com/appledailyent