九倉(004)旗下九倉電訊舊年用名模Mandy Lieu做代言人兼拍廣告,諗住搵靚女推銷點都有吸引力,點知好多人睇完個廣告,都係唔知九倉電訊賣乜,咁啱Mandy泊到好碼頭,最近要專心湊B,九倉噚日就宣佈,改用「高登女神」謝安琪(Kay)做代言人嘞。
Mandy Lieu與人夫洗米華愛得高調,近日更有雜誌指佢已為對方誕下B女。九倉電訊總裁馬惟善噚日宣佈新宣傳計劃時,冇評論係咪因為Mandy Lieu形象轉差而唔續約,只係比較行貨咁話,Kay係公司嘅適合代言人選,讚Kay有正能量,歌唱與彈琴都好叻,可以配合公司宣傳策略。
九倉電訊發言人又補充,指過去每位代言人都係簽約一年。適逢今年係公司成立廿周年,就選用Kay代言拍新廣告,想推雲端服務。