黃芷晴、林雅詩、黃夏蕙同一班奇妙電視藝人今日化身聖誕女郎，喺銅鑼灣出席聖誕送大禮活動，只要下載手機應用程式就可獲得聖誕禮品包。

雖然天氣寒冷，但係林雅詩衣衫單薄，佢表示要靚唔要命，不過黃芷晴剛好相反，佢話：「我要命呀，之前病咗一個禮拜，o依家喉嚨仲發緊炎，聲都變咗，所以要着返多啲衫。」

講到聖誕節快到，黃芷晴表示有假放，可以同家人、朋友過聖誕，佢話：「要忙住買禮物，仲有整甜品，媽咪份禮物已經買咗，反而爹哋嗰份仲諗緊。送砌圖？就係送得太多，爹哋好鍾意砌微型積木，訂咗個好大嘅櫃，點知已經擺滿晒，佢話暫時要停一停，或者煮餐飯，但佢比較忙，成日唔喺香港。」男友呢？黃芷晴表示會一齊慶祝。至於林雅詩想同囝囝去熱帶地方過聖誕節，佢仲話：「阿仔已經send咗Christmas e-Card畀我，好潮呀，但我鍾意老土，我想佢寫，會覺得窩心啲。」