蔡卓妍同關智斌一齊到中環出席LV活動，阿Sa話活動後就會返鄉下東莞，預備Twins嘅演唱會，佢話老竇自己買咗一百張飛，送俾鄉親去睇騷，笑言可以撐起個場，仲話：「老竇仲提我話唔好講錯，唔係東莞，係東莞長安。」

身傍嘅Kenny就話，阿Sa先前俾咗《原諒他77次》嘅首映門票佢，但係佢就忘記咗去睇，記者問佢係咪會同女朋友或男朋友去呀？Kenny笑住話：「咪就係搵唔到人囉！係一個好傷心嘅理由。」阿Sa就踢爆佢話：「你根本就係唔記得咗。之後6月上映你要補番。」

現場見到Kenny暴瘦，佢解釋話係因為之前拍戲要減肥，但就過咗龍，原先想減到66kg，但o依家減到60kg，笑話就嚟瘦過阿Sa。阿Sa仲笑住話Kenny：「佢好注重身形，望住嘅倒影，有啲反光位見到自己，都要讚自己靚仔，超級貪靚。」Kenny就話：「你做乜講啲真相(靚仔)出嚟呀！」阿Sa就沒好氣咁回應：「你去死啦！」

細仔啱啱滿月嘅周汶錡，今日就坐完月現身，仲好性感露出個bra邊，周汶錡又話坐咗月成個月，終於出嚟，講到生完BB都係咁fit，佢就話因為餵人奶，所以都冇減肥，但係個磅數都同生之前冇咩分別。