廣船H股去年10月股價曾高見68.5元,經過一輪下跌,如今股價已跌到落20元,但係供股價僅5.55元多些(估計高呢個價唔會好多),折讓仍係相當驚嚇,雖然低價供股可能吸引貪平貨投資者,但係對股價即時壓力唔細。
國企供股,最經典莫過於去年10月初,鞍鋼(347)公佈以每10股供2.2股,H股供股價為15.91港元,A股供股價15.4元人民幣,較當時股價大幅折讓47%,集資共201億元人民幣,作為收購營口港鋼鐵項目。由於去年10月港股尤其中資股炒到熱火朝天,供股反被視為好消息,公佈後股價竟可單日勁升15%。
情況一如97年紅籌國企話配股集資搞收購注資,股價唔炒到飛起至奇,但到咗98、99年,同樣配股集資,唔炒不特止,仲要插到飛起。廣船今次供股,不幸遇着環球跌市,相信都幾難重現鞍鋼去年嘅股價神勇表現。