坤哥吳業坤去深水埗食串燒之前,同周柏豪喺荃灣出席新年倒數活動。活動上,坤哥話今年係第一次做春節倒數活動,而初一至三會關電話休息,初四先開工拍劇。坤哥承認最近工作量多咗,但否認自己升呢。佢話:「第一年有得做呢啲活動,好開心同溫暖。」笑問坤哥個銀包係咪都「溫暖」咗好多?佢就話:「暖咗啲啦,係多咗啲,但距離頒獎禮到依家都係個幾月,唔係好長時間,不過都有買花送畀媽咪,而且冇講價,大家都想賺啲開心錢!」
至於同場嘅周柏豪,佢話今年準備咗五位數字派利是,笑指佢年廿九仲開工,啲錢由年頭賺到年尾,柏豪就話:「有工開當然好,但初一、初二會休息,初三就要開工出席花車巡遊活動。」
不過,柏豪話今個新年心情麻麻,因為愛貓啱啱剛咗過身,媽咪都好傷心,佢噚日話:「隻貓年紀都大,今日啱啱過咗身,今日嚟活動前都要幫佢辦身後事,媽咪好唔開心,今日都有陪佢tea氹番佢。」