恒生（011）副董事長兼行政總裁鄭慧敏（Louisa）上場後，落力幫同事爭取更多福利，繼上月宣佈加產假至16周後，近日又再加員工福利，明年度超過8000名香港員工嘅團隊活動津貼，按年增25%至每位1500蚊，總開支至少1200萬元！

華華聽聞恒生每年都有為各部門提供團隊活動津貼，今年度每位1200元，明年度增至1500元，適用於逾8千員工計，銀行額外要拎多240萬元出嚟，不過可以增強銀行上下嘅團隊精神，少少錢又算得係咩，恒生員工平時咁搏命，直頭抵加人工㖭啦！

不過有時又咁講，有時公司加津貼，同事都唔敢用，驚公司計較著自己用咗幾多！呢方面恒生員工就唔使擔心，因為Louisa已經坐言起行，早排搞咗場happy hour，同逾50位同事「摸酒杯底」，包括CFO梁永樂、執行董事兼零售銀行及財富管理業務主管關穎嫺、司庫兼環球市場主管周丹玲等，答謝團隊嘅努力。

一姐特意安排咗場品酒會，邀請酒業公司專家到場，講解多個國際知名品牌嘅葡萄酒，包括受內地客戶特別喜愛嘅品牌，大家一齊長知識咁話！