現年35歲嘅韓劇《通往機場的路》男星李尚允，噚日同拍拖一年嘅28歲女團After School成員UIE分手，UIE方面直認消息，指兩人因為工作太忙而疏遠。

唔知係唔係分手後可以更加專注事業，今日韓國方面就指李尚允已接拍SBS新劇《悄悄話》，並會同《聽見你的聲音》嘅38歲女星李寶英合作，劇集將於下周二開拍。今次係李寶英產後復出嘅作品，同時亦都係李尚允同李寶英第二次合作，兩人於2012年合作《親愛的素英》，並飾演夫妻，當時錄得47.6%超勁收視，今次二人再攜手，自然惹來關注。

《悄悄話》以韓國最大律師樓發生嘅故事做題材，會揭露唔少社會現實以及權力鬥爭嘅故事，劇集將於3月接檔李寶英老公池晟嘅《被告人》播出。