日本長腿索模菜菜緒喺藝能界極之搶手，早兩日佢忽然自爆身上生滿粒粒，最初以為食物敏感或係濕疹，經去睇完兩次醫生，終於證實係工作過勞同壓力引起嘅皮膚病，但菜菜緒依然忙到七彩，下年兩套電影同兩齣新劇排住隊出街，噚晚仲頂硬上出席埋日劇《FirstClass2》慶功，見菜菜緒都係咁省鏡，似乎纏繞咗佢好幾日嘅煩惱已經好轉。

澤尻英龍華擔正嘅《FirstClass》系列播出後口碑唔錯，可惜第二季收視欠佳，但都冇影澤尻心情，仲同班拍檔合作愉快，噚晚慶功就同友坂理惠、倉科加奈、篠原友惠、夏木麻里等打成一片，招待埋負責影宣傳海報嘅攝影師LeslieKee出席，就算輸收視teamwork都算贏晒！