餐廳R帶埋法國友人嚟飲茶，傾吓葡萄酒銷情。法國人舊年嚟過香港，參加會展之「酒展」，今年又到，理由一樣。呢位法國先生經營一個葡萄園，位於馬賽與尼斯之中間，謙稱自己間屋細細哋，如果我哋去法國南部旅行，唔嫌棄嘅話，可以住在佢間屋，欣賞吓風景，嘆吓紅酒白酒。左丁山見慣香港啲細屋，一時腦筋轉唔到彎，竟然問佢間屋細成點？餐廳R代答：「我住過，真係好細，只得三十六間房啫！」
一層西半山區六十八樓，原來可以買咗佢嘅葡萄園兼細屋，仲有唔少錢剩低慢慢使，抵到爛嘞，同胞不妨去法國掃貨。呢位酒莊S話：「我好歡迎中國人掃貨，不過我賣嘅係酒，唔係我嘅地方。今勻嚟香港，大有收穫，會展酒展今日星期五閉幕，相信有過萬人到場，比舊年仲熱鬧。我哋嚟參展，旨在收卡片，釣新客戶，呢，我已收到三十二個中國客戶嘅卡片，個個叫我緊密聯絡，有得傾。你知啦，我愛中國，我愛中國市場，市場可能非常非常大，最弊我唔識中文，點好呢？」
咦，睇嚟識中英文（識埋法文、意大利文、西班牙話仲正），兼識葡萄酒嘅話，會有工做。香港取消紅酒稅之後，紅白酒貿易大增，歐洲公司逐漸湧至，內地大富翁亦開始在香港租用儲酒倉，就好似香港有錢人一向在英國買酒儲倉一樣。故此一啲工業大廈已有單位改裝成為紅酒倉，做內地人、本地人生意。取消紅酒稅嘅政策，開始帶來經濟效益，特區政府每年少收十五億酒稅，但促進了整個行業的發展，對香港整體嚟講，所得利益蓋過酒稅損失，香港成為亞洲紅酒中心，對金融中心有輔助作用。