發展商樂基集團董事長何壽基，噚日擇定正午十二點吉時，喺九龍城新盤成龍居門口，率領三位千金主持開盤拜神儀式，一家大細上香、切燒豬、開香檳同剪綵，樣樣做到足，氣氛溫馨熱鬧，呢啲咁家族式嘅作風，𠵱家都好少見，只有老牌家族發展嘅物業，先至會保留呢個傳統。
咪睇何伯份人咁傳統，個盤唔會有新意，偏偏成龍居個停車場，引入全港首創，兼獨一無二嘅全自動泊車系統。以停車場嘅面積，原本最多只可以泊二十部車，𠵱家放到七十四部，慳番好多地方，保安重相當嚴密。
蘭茜噚日去睇測試系統，有個攝記入咗部𨋢影相，搞到成個系統即時停頓，原來係呢套系統嘅獨門防盜設備，只要感應到有人在𨋢內，便會停止運作。
呢個設計，亦可避免唔記得抱BB落車，運咗去密室都唔知。
羅湖住宅擺檔收票
深圳羅湖東門嘅東悅名軒快將推售，發展商泛海集團同漁陽投資，噚日委託置業國際做獨家代理，先推五十個內購單位，呎價約六百蚊，比發展商目標價低兩成。個盤總投資四億，聽講泛海喺五個月前至入股，話咁快就可以賣樓套現。泛海佔四分一股權。
聽漁陽投資董事長王作明講，估計下個禮拜三有預售證。但上周只係喺樓盤門口擺檔，已收近二百票，港客佔四至五成。呢個盤提供細單位，三百幾至九百幾呎，容易租，回報率最少有九至十厘。香港有三家銀行做到八成按揭，利率約三厘六，兩成二按，利率近六厘。
中巴祖屋起高樓
中巴顏氏家族位於堅尼地道六十四號的祖屋可能會重建。早前城規會將該二萬八千呎嘅祖屋地，規劃做住宅（丙類）用地，限起四層或約十一米高。顏氏家族當然提出反對，要求塊地轉為住宅（乙類）用地，地積比率五倍，大約可起二十層。此外，因為附近有好高嘅合和中心，所以喺山頂望番落嚟，都唔會覺得重建後嘅建築物好高兼遮咗維港景。城規會睇過後，認為意見可接納。顏氏重建祖屋大計又少咗重障礙。
皓朗山莊似歌劇舞台
時下流行香薰治療，沙田九肚山皓朗山莊，原本係示範單位嘅一號屋賣咗，發展商耗資三百萬元，喺十號屋搭建新示範單位。設計概念同靈感，源自六十年代西方歌舞劇《國王與我》，廳房擺放咗唔同嘅香薰，為參觀準買家提供嗅覺享受。
廖創興企業董事衛振聲話，個盤賣咗二十間屋，套現近三億元。今次重點推售三千八百幾呎嘅大型洋房，每呎五千至五千六蚊，今個月底前買樓，獲贈一年管理費，價值十萬。香薰加優惠，實行雙管齊下促銷樓盤。