印尼超級富豪黃奕聰家族成員，喺香港主力嘅股票，有香港建設控股（190），大股東又連番增持港建，有遐想之餘，兼博同類全購股宏安集團（1222）嘅倍升翻版！
港建掌舵人黃剛，喺今年頭買入第三方所揸港建15.65億股，權益由44.7%，增加去到58.5%，跟手再全購。啱啱公佈無耐，黃生同一致行動人士權益，進一步加到全購後64.3%。前後來回計數，黃生增持咗港建近20%，實實在在真金白銀投港建一票之餘，日後想再加碼增持話，可以海闊天空，而港建現價（0.33元）比提購價0.25元，升咗32%咁大把。

掌舵人增持惹憧憬

再睇背景，黃剛叔父黃鴻年，喺科網潮時候，賣盤得信佳畀小小超，得信佳兼創下單日最高升22倍紀錄！黃剛阿爺黃奕聰，係印尼超級財團金光集團創辦人，報載集團坐擁過2,000億元資產。黃氏家族實力超晒班，已經好有遐想，何況港建得30億元市值，掌舵人又兩級跳增持，憧憬被湊大，唔係無咁嘅機會。
就當乜都唔發生，場內近磅市值嘅內房企業，有12隻，平均0.96倍PB。就算剔除最低同最高PB嗰兩隻唔計，再拉平均數，亦講緊0.76倍PB。港建得0.29倍PB，都大折讓咗62%！
又場內宏安，上年6月同樣提全購，要約人士由原先揸近29%，上升去到63%。之後宏安就放紙鳶，現價比提購價，累升咗100%，比起公佈提購計劃前一日收市價0.169元，大升咗172%，PB上到0.77倍！
呢轉煲港建，博宏安翻版，以港建提購計劃前一日收市價0.21元，升172%計數，要見0.57元，即係現價要升80%！又港建追番上近磅內房平均0.76倍PB，要升167%到0.84元！

錢雋
細價股專家
本欄逢周一、三、五刊出