鄧麗欣（Stephy）、徐榮一家四口、楊鎧凝、鄭麗莎今早在大潭出席奧比斯慈善步行活動，起步前一齊做熱身操，徐榮囡囡徐心怡（包包）慢慢跟隨動作，十分可愛。

Stephy話自小學起已二、三百度近視，上堂經常睇唔到黑板，甚至要偷睇隔離同學筆記，Stephy話：「嗰時又貪靚，唔想戴眼鏡，冇同媽咪講，到中學時五、六百度近視先，仲搞到成日認錯人同唔應人，人哋以為我好cool。」

Stephy噚晚同好姊妹吳雨霏、區文詩（Angela）食飯，Stephy話：「好耐冇見，自從Kary有咗BB都冇見面，佢依家好好，幸福滿面，唔算肥好多，只係飽滿咗少少。」Stephy透露Kary已經陀B六個月，至於性別方面，Stephy今次好口密叫大家問番當事人。另一好姊妹楊愛瑾懷孕嗰時，被Stephy無意漏口風爆陀仔，Stephy話：「上次真係冇心，今次死都唔會講。」Stephy現時已有兩個契仔，所以冇爭住做契媽，但一直想有個契女等待中。

徐榮刻意帶子女出席不同慈善活動廣闊認知，佢透露將四月喺石門開設教育中心，隨語言教學外，亦設有足球、司儀同演戲等興趣班，屈時徐榮會親自授課司儀同演戲，同時搵緊朋友幫手做客席講師。

精選娛聞，喺晒《娛果》
http://fb.com/appledailyent