有「凶宅大王」之稱嘅資深投資者伍冠流，今年動作唔算多，不過佢最近就收到市建局通知，話有意收購佢喺紅磡嘅一伙舊樓物業。伍冠流唔等錢使，嫌市建局出手低，冇意思賣住，仲話細單位最多跌幾個巴仙，跌極有限。
66歲嘅伍冠流投資凶宅廿年，轉手嘅凶宅過百個，凶宅大王並非浪得虛名；佢講過，凶宅七折買入，九折賣出，多數有賺；不過太凶嘅凶宅，佢都唔會買嘅。除咗凶宅，佢亦有投資舊樓、半契物業。

205萬元買入博收購

伍冠流噚日同華華吹水，講講吓自爆，最近收到市建局嘅掛號郵件，係關於土瓜灣庇利街榮光街發展項目。佢個舊樓單位位於紅磡環發街19號同環興街20號，實用面積大約520方呎，伍冠流2014年用205萬元買入，一心都係博收購，加上租值高，每個月租到9,400元，回報有成5.5厘。
市建局出價597萬元收購，呎價1.15萬元，同佢心水價1.5萬元有段距離，伍冠流決定唔賣住，仲話「感覺係回報幾好，所以唔在乎，等市建局出高啲價錢先」。
伍冠流認為，細單位最多跌幾個巴仙，跌極有限，要入市都係睇折扣大唔大，仲叫華華如果買樓，不妨大膽還價㖭。

李華華
mailto:[email protected]