亞姐決賽前夕，原定20位候選亞姐，昨日只得19位參與大埔錄影廠拜神儀式，亞視統籌副總裁葉家寶表示泰國代表12號潘麗娜芭派，因身體不適，而且多次缺席綵排，亞視建議她退選，葉家寶說：「佢都唔開心，聽日就選，不過，都要無奈接受，佢因為身體唔舒服，成日暈，冇綵排好多日，已經睇過醫生，醫生都覺得佢唔好參加，佢可能水土不服又思鄉病，擔心屋企人所以瞓唔到。」

19位候選亞姐穿着中國旗袍拜神，然後再換上三點式泳裝示人，大會安排的三點式色彩繽紛，但款式卻遮掩了部份佳麗美好的身材。擁有35吋上圍的6號袁小曼說：「件泳衣條繩索得唔夠緊，前面鬆晒，真係好危險，着完旗袍換泳衣都太趕。」
大會安排19位候選佳麗互選眼中3位「必in」佳麗，結果1號姚佳雯、3號顏子菲、9號賴琳恩順利成為大熱之選，姚佳雯說：「我仲以為大會唔會公佈個結果，點知即時公佈，搞到好尷尬。」對於泰國代表退選，姚佳雯說：「都好可惜，不過佢仲細，第日可以再選，平時見到佢身體唔係咁好，可能壓力大又掛住屋企。」
第一個被點名成為「必out」佳麗的，是曾於內地獨得20多萬票贏取網絡人氣第一名的19號王譽霖，當她聽到自己的名字時，表情錯愕，定神後隨即黑面，跟其他兩位「必out」佳麗10號綺蓮娜寶露柔素娃和20號李菲合照時又強顏歡笑，事後她表示沒有不開心，更否認黑面，她用普通話說：「佳麗的投票，不代表觀眾同評判，心理有準備，當是一個盛大的演出，當自己是其中一個演員。」

今晚亞姐決賽上篇，還有神秘嘉賓詹瑞文挑戰香港電視尺度，大會統籌葉家寶說：「詹瑞文話聽到亞姐挑戰選美史上尺度，以公投形式，佢都話要作出挑戰，大膽露毛演出，係佢自己講，所以我哋都驚驚哋。」
採訪：楊潔雯
攝影：陳慧安