姜麗文（Lesley）、鍾舒漫（Sherman）、陳柏宇同林德信噚晚出席一個慈善音樂會，目的係幫助情緒受困，曾想輕生嘅年輕人。

Lesley以過來人身份分享，以前患上抑鬱症嘅經歷，佢承認患病嗰時，曾經有過輕生嘅念頭，佢四年內復發過三次，仲係一次比一次嚴重：「我都唔鍾意講，但係必須嘅，最重要係幫到人，醫生同科學家都唔係好了解抑鬱症。」Lesley話做運動幫到佢好多，仲有專心工作。

Lesley話爸爸係去到佢抑鬱第三次復發先知道：「因為爸爸嗰時喺大陸拍嘢，佢好錫我，怕佢會擔心我，當時自我價值好低，佢知道我唔開心，但係唔知道去到咁嚴重。」如今已經康復，被問到係唔係可以接受新戀情，Lesley話：「Ready好，但係聖誕節要做嘢，四年冇做過嘢，有工作好好，唔怕忙，唔怕辛苦！」

鍾舒漫（Sherman）就話今次係接受Lesley邀請，佢話：「希望可以鼓勵年輕人唔好有輕生念頭。」講到低潮，Sherman話佢o依家係低潮，因為發現控制唔到把聲：「可能依幾年都辛苦，自己好勤力去唱歌、剪片，太chur，之前唔覺得有問題，但開始有啲痛所以好驚。其實十年前出道之前都試過失聲，但係醫好咗先出道，嗰時覺得自己好廢，都有啲depression，有啲憎唱歌。今次睇番之前醫好咗我個中醫，佢見到我就即刻退後兩步，話我咽喉腫得好犀利。不過依家心情都OK，個人醒晒，唔係要push到自己去到某個位先有價值，學識享受好緊要，好想將經歷同大家分享，覺得因禍得福！」

更多娛聞，喺晒《娛果》
http://fb.com/appledailyent