【新增圖片】

現年57歲患有抑鬱狂躁症的前DJ洪朝豐，上星期確診舌癌，做了超聲波同磁力共振之後，今日取報告，證實患第一期至第二期舌癌，醫生建議他盡快進行割脷手術。

今日從佛山返港取報告的洪朝豐，於電話中向《蘋果》表示：「今日報告出嚟，話係第一至第二期舌癌，醫生話要割三成至五成條脷，割咗之後要用番身體組織填補番。而且可能要破開個下巴做治療，建議我盡快做手術，我左邊條脷有事，左邊頸嘅淋巴有好多粒粒，可能係同呢個癌症有關。」

「我有晒心理準備，西醫有治療方案，唔使我做化療同電療，但就建議我盡快做手術。我同醫生講，呢個對我嚟講，係好殺傷性嘅手術，因為直接影響我講嘢能力同食嘢嘅功能，甚至可能會破相，因為可能要破開下巴做治療，所以我都要好仔細咁想清楚。」

洪朝豐透露，確診患上舌癌後，有看過中醫，至昨日為止服了五日中藥，感覺減輕到痛楚。他稱：「食完中藥之後，每日條脷感到嘅痛楚係少咗啲，所以我決定今個月底去內地三個禮拜，做一個中醫治療，睇吓病情有冇進展，先至決定之後點做。」

但洪朝豐也補充謂，舌癌蔓延得好快，本來醫生建議他盡快做割脷手術，但因為他想試埋中醫，所以錯過了黃金治療期。

他又說：「我侄女、前妻都好關心我，醫護人員又不斷提點我，所以我覺得自己好幸運，如果你問我呢刻心情點樣，我可以話你知，我覺得自己好好運氣，好多人愛錫，包括醫護人員、屋企人同朋友，就算我依家拍緊嘅內地網劇劇組人員，都好錫我、好關心我，將來係點冇人知，最緊要活得開心。」洪朝豐今日取完報告後，即日便要趕返佛山拍網劇。