政治市最難搞！而家瞓醒，除咗要睇公司通告、大行報告，仲要睇特朗普twitter。不過，特朗普經常反口覆舌，呢頭話會打敍利亞，嗰頭又話冇咁快郁手，轉頭就射105枚導彈過去。雖然戰事未見擴大，美股期貨反彈，但港股除咗怕導彈戰，亦怕貿易戰，總之，戰戰驚心啦！

講到貿易戰，美國對中國加碼嘅1,000億美元關稅清單最快本周出爐，中美駁火，香港躺著也中槍。港股周一跌492點或1.6%，收30315，已連跌三日，三枝陰燭，形成「三飛烏鴉」，係利淡嘅轉向形態。恒指喺三萬關打咗兩個月攻防戰，短期有機會失守，支持位暫時睇29,500。

美國同俄國、中國關係緊張，美股全面陷入政治市，雖然業績期開鑼，摩通、花旗、富國上周五公布嘅季績好過預期，但美股不升反跌。諾貝爾經濟學獎得主席勒（Robert Shiller）接受CNBC訪問時，話未知跌市原因，但佢相信，市場喺特朗普嘅領導風格下，會持續波動。

環球股市睇美股頭，美股頭暈暈，港股就腳震震。波動市揀股，高息股係可攻可守之選，但要揀盈利同派息都保持增長嘅股份，尤其依家港滙弱勢，金管局上周四至今多次出手接錢，加息訊號已響起。如果冇心水，就忍下手，寧願錯過，唔好做錯。

我近排就留意緊鷹美（2368），該公司以產銷運動服為主。由於客戶包括美國Nike、The North Face等，市場一度擔心會受貿易戰影響。上月尾，公司宣布以接近成本價向大股東裕元（551）買入越南廠房。越南同印尼廠房可應付美歐定單，唔會有「中國製造」問題；汕頭同江西廠房則應付中國內銷。

裕元持有鷹美38.42%股權，身兼主席同行政總裁嘅鍾育升則持股17.32%。鍾主席上周連續三日增持，反映對公司前景充滿信心。鷹美3月底年結，6月派成績表，近年多賺多派，派息比率近七成。該股現價3.83元，市盈率12.4倍，股息率6.3厘，走勢呈杯柄突破。

割柑人

全球樓行 Dream House零距離
https://hk.feature.appledaily.com/overseasproperty