周大福（1929）賣珠寶首飾咁好賺都唔夠，要入股金融服務公司寶華世紀搞埋教育？但問清楚，原來唔係周大福，而係人稱五叔嘅鄭裕彤細佬鄭裕偉，佢位公子鄭劍豪私人買咗寶華旗下金融教育業務10%股份，但冇講作價幾多。
據寶華發言人講，佢哋喺內地嘅金融教育業務都開始咗成年，有同過好似工行（1398）咁大嘅企業做金融相關嘅培訓，日後亦會為有興趣嘅大眾開班。佢仲話，好似佢哋位星級經濟分析師陳寶明，都有返上去parttime教吓書，真係唔睇得少。
佢哋課程嘅實用程度華華一定唔會懷疑，但係內地政府認唔認可呢？寶華發言人話，畢業文憑係由佢哋同個別地方部門發出嘅。中國咁大，若果咁地區性，會唔會影響個受歡迎程度㗎？