恬妞、邵音音和錢小豪昨晚帶同家人現身九龍灣，出席賀歲片《如珠如寶》的謝票活動，恬妞此行相當趕急，前日從北京返港出席首映禮，昨日接受連串的訪問，晚上又要出席謝票活動，今日起程返回北京，不過她笑言：「真係唔係呃你哋，其實拍戲一啲都唔辛苦，宣傳真係好辛苦。我哋嗰個年代冇謝票呢啲嘢，雖然係好攰，但係我好鍾意，一來可以知道觀眾對套戲嘅反應，二來睇見佢哋熱情，即係好似開演唱會，聽到大家嘅掌聲，真係好感動。」

問到恬妞會否返港拍電影？她笑說：「我係希望多啲謝票，好似音音姐，佢話佢係謝票王后，已經謝票咗400場，我只係10場好難追，如果唔使講咁多嘢，應該好好玩。」恬妞表示年三十晚會返台灣陪媽媽：「我返去抱住屋企嘅寶貝過年，今次係唯一一次休息15日，之後再返大陸繼續開工。」她還說：「其實我一路都冇退休㗎，喺大陸拍電影同拍劇，只係香港冇播啫。我好想返嚟呀，今次返嚟宣傳，行街仲有好多人都識得我、記得我，而且經過呢幾次謝票後，感覺到觀眾對我嘅愛惜，好多人都叫我快啲返嚟拍戲畀大家睇，搞到我都好慚愧，一定要快啲返嚟拍戲。」

記者笑稱大家很記掛「恬妞式廣東話」，她哈哈笑說：「我真係冇進步過，喺戲裡面有一句對白好似講粗口，真係好嚴重，應該係林敏驄專登整蠱我！」

每晚送5萬！星期一至五晚上10點半
《動腦Q》Let's Q the money！
http://bit.ly/2QW8LcI

精選娛聞，喺晒《娛果》
http://fb.com/appledailyent