唔知大家有冇發現，地產界似乎係男人世界，香港五大地產商主要做樓盤銷售嘅揸弗人，家陣清一色係男士；就算有女性，都只係花瓶角色。超人旗下長實地產（1113）近年有女將好標青，其中已經係一女之母嘅「靚媽」何家欣（Cannas）更加火速上位，啱啱紮職升做助理首席經理（營業），成為營業部最高級女將。
Cannas今年39歲，持有測量學理學士學位與市場學理學碩士學位，2007年加入長實做營業經理之前，喺信置（083）跟𠵱家已經過檔恒地（012）嘅韓家輝學賣樓，2006年信置賣荃灣萬景𥧌，佢開始負責sell盤。

四大女將中年紀最細

而長實營業部有四大女將，職級本來相若，Cannas年紀最細，過去10年，跟過幾個大型樓盤，好似將軍澳日出康城系列、大埔嵐山等，但一直未坐正，主要講解樓盤特點同會所之類。
直至2012年，Cannas同封海倫升呢做高級營業經理，開始獨立處理一些細項目。2015年，Cannas接手負責元朗過千伙大盤「世宙」，開始上位擔大旗自己一個揸盤，個盤唔使一年賣晒，幫長實套現過百億。
咪睇佢外表溫柔，賣樓好落力㗎，抵佢升職，成為營業部第二把手（之上有3位上司，對上先係趙國雄），佢亦係4位女將中，唯一紮職嘅一位。

李華華
mailto:[email protected]