【新增動新聞】
曼聯禮拜日會喺聯賽主場鬥愛華頓，領隊摩連奴相信到時回歸奧脫福嘅朗尼會受到主場球迷嘅歡迎，不過佢就講到明，話比賽期間唔需要對朗尼太客氣！

今次會係朗尼自從今個夏天離開紅魔鬼重返母會後，第一次作客奧脫福，曼聯領隊摩連奴賽前話：「我相信佢會得到應得嘅歡迎，佢絕對係呢間球會嘅傳奇人物，無論從上陣次數、入波數字定係贏過嘅錦標嚟睇都係。好明顯朗尼係曼聯史上其中一位最重要嘅球員，我相信主場球迷會畀佢應得嘅尊重，無論係開波前抑或完場後都好，不過比賽期間就免喇！」