當年今日
關於我們

【華姐首見傳媒】法官大人…雷莊兒靚咗 有機會問鼎三甲?

蘋果日報 2018/01/24 20:34

記招華姐選美雷莊兒余思霆

前稱「國際華裔小姐競選」嘅「國際中華小姐競選」又嚟喇,首屆係1988年,冠軍係香港代表李嘉欣,仲拎埋最上鏡小姐,同屆仲有舊金山代表郭秀雲,佢拎季軍。
之後鍾麗緹、盧淑儀、葉璇同郭羨妮、廖碧兒、鍾嘉欣、李亞男、岑麗香、張曦雯、陳凱琳等都拎過華姐冠軍,但論香港代表摘冠,呢十六年嚟,得一個,就係陳凱琳,對上嗰個已經係2000年嘅郭羨妮。
咁今年呢?香港今年有冇機?有喎!今年香港代表係邊個?係雷莊𠒇(Juliette)。今年,有勝算喎!
唔係#曲,絕對唔係。當選港姐一段時間,雷莊𠒇化妝技巧進步咗都好合理,而且,佢今日出嚟見傳媒嗰陣,真係靚咗。
是日「國際中華小姐競選」候選佳麗齊集尖沙嘴首晤新聞界,樂易玲同余詠珊都有出席。上屆冠軍、紐約代表余思霆為16號佳麗伍殷嬅試戴后冠。
好,大家最關心嘅係,今屆佳麗質素點?三個字:唔穩定。或者係,「參差」。
候選佳麗年齡介乎18歲至26歲,大部份係學生。最高係5呎11吋、來自夏威夷嘅2號楊筑晶(Crystal),外形有少少似蔡思貝,不過佢就重148磅,亦係最具「份量」嘅一位;最嬌小係5呎3吋嘅12號新加坡代表蔡美琪(Christina),佢亦都係年紀最細一個,今年18歲,仲係學生。
雷莊𠒇話,已經同眾佳麗交流過,佢話冇諗過邊個係勁敵:「唔敢講打贏人哋,冇人想輸啩,我覺得每個人都好好。」4號鄭吉隆坡代表鄭亦庭(Tiffany)、6號洛杉磯劉思延(Angela)同7號馬尼拉代表吳雪蓮(Joy)都話有信心獲獎,但對泳裝環節就話好緊張。