【傅恆鞠躬道歉】為黑面拒接fans禮物解畫 許凱指太攰反應唔到:對不起
陳豪佘詩曼蘇青延禧攻略吳謹言魏瓔珞許凱爾晴傅恆
「爾晴」蘇青、「傅恆」許凱、「魏瓔珞」吳謹言及佘詩曼今日合體宣傳。
《延禧攻略》熱爆中港台三地,無綫專登請咗「魏瓔珞」吳謹言、「傅恆」許凱、「富察皇后」秦嵐同「爾晴」蘇青嚟香港,加埋「繼皇后」佘詩曼一齊做宣傳。
今日中秋節,幾位主要演員喺將軍澳錄影完特備節目《延禧南巡》之後,許凱、吳謹言、蘇青同阿佘一齊接受傳媒圍訪。許凱噚日落機時個樣cool爆黑面,連fans送禮物都唔收,許凱今日解畫同鞠躬道歉。
許凱話:「抱歉!其實我沒有黑面,我怎樣會對支持我的人感到不開心呢?這陣子工作太忙了,天天也趕飛機,加上喉嚨痛,昨晚下機的時候還是被拍醒了,所以太矇,什麼反應都做不過來,真的對不起。」問佢有冇覺得憑該劇走紅但失去自由?許凱話:「很少出外面,最近忙於工作。」佢最近同大陸女演員白鹿因為合演古裝劇《招搖》而傳出緋聞,許凱仲被影到去上女方屋企過夜,許凱否認緋聞話:「大家在網上怎麼說,自己控制不到,就不去講了,現在集中工作上,沒有考慮戀愛。」許凱話自己現時單身,佢喜歡善良、單純同溫柔女仔,問佢中唔中意「皇后」秦嵐、阿佘或吳謹言類型?許凱話自己唔接受姊弟戀:「她們是姐姐,好照顧我,但不可以,我跟吳謹言關係很好,因為大家是同事,有經常聯絡。」
憑「魏瓔珞」爆紅嘅吳謹言,被傳廣告酬金升價十倍,對此佢話:「劇本和廣告都由公司挑選,我不清楚。」吳謹言主演嘅新劇《皓鑭傳》即將推出,佢飾演嘅李皓鑭性格硬朗,同《延禧》角色極為相似,問佢擔唔擔心被定型?佢話她拍攝時反應同故事都唔一樣,可以畀到觀眾新鮮感。
吳謹言話自己係林俊傑JJ老粉絲,所以噚晚到港之後隨便食啲嘢,飲咗佢至愛嘅奶茶就趕去紅館,之後亦有到後台同JJ合照。咁JJ有冇睇《延》?佢話:「我肯定他應該看了一下,他能叫我瓔珞。」早排吳謹言被指耍大排影響形象,佢話工作情況已經好轉。會唔會嚟香港發展?吳謹言話期待同劉德華、梁朝偉、張曼玉合作。而對於外傳佢身價升至800萬,佢否認話:「沒有,還要看後面接的劇本、角色,聽公司安排。」
「爾晴」呢個角色勁乞人憎,網上仲出現咗好多佢嘅表情包,蘇清話自己都有參與其中:「看到有網友的創作力不夠,我就賜了他們另外的表情包。」講到《延禧攻略》監製于正公布開拍《延禧攻略2》,蘇青爆料話將會係全新故仔:「用另一種形式把我們再聚在一起。」蘇青講到今日錄影節目時林盛斌(Bob)扮「爾晴」,佢大讚Bob好可愛話:「見到沒有想吐,但知道吃很多就會變這樣,自己要控制飲食。」蘇青話唔擔心演奸角被定型,自己今次第一次做壞人角色,所以覺得壓力好大。
另外,阿佘就為咗今次活動專登喺外地趕返香港,佢話個劇迴響大,自己都好開心,正在享受成果,問佢出街有冇畀人鬧?阿佘話好彩冇,啲人只係鬧爾晴。阿佘又話一直都有同無綫傾緊工作,透露未來會有機會再合作。
精選娛聞,喺晒《娛果》
http://fb.com/appledailyent
許凱提到噚日落機黑面,話係因為休息時被拍醒,所以俾唔切反應。