球圈中怪傷事件簿何其多，昔日有前西班牙門將簡尼沙利斯因鬚後水樽跌落地擊中腳，搞到02世盃冇得踢，亦有前小保加射手巴勒莫樂極生悲，慶祝時被場邊廣告版倒冧砸親唞半年。今周，我哋先聽到皇馬小將馬高阿辛斯奧因為剃腳毛受感染而要缺席周中歐聯比賽，點知幾日後李斯特城後衛基斯甸富治斯嘅傷，英媒亦形容係萬中無一。

李城領隊莎士比亞出席英超賽前記招，就證實富治斯因傷未必可以喺周末對哈特斯菲爾德場波上陣，但受傷嘅原因係佢日前練波時，隻眼被訓練杆插親。大家應該知道球員平時練習扭波時，以往係扭雪糕筒，家陣多數會戙住一支支嗰啲訓練杆，根據莎士比亞所講，富治斯就係被訓練杆彈起時整親隻眼。

富治斯雖然視力冇受損，但搵專家check完後，就建議佢唔係好適宜比賽，但莎士比亞話要睇佢聽日情況點，先決定派唔派佢上陣。