港股全日大跌超過400點，呢400點話畀大家知一個字：驚。

A股入唔到MSCI，中國再一次收好人卡。MSCI冇錯又講出三個中國未能得米嘅問題，但講到尾都係驚咗你班中國。

你又唔怪得人，當局冇錯係推停牌新規，但中國最擅長搬龍門，要時間觀察合情理。

至於未來中國會唔會為闖關繼續迎合MSCI？相信答案係會。大家要注意中證監回應係「對MSCI的決定是同意和支持的，但強調，任何沒有中國A股的國際指數都是不完整的」。

回應係幾咁得體、幾咁humble、幾咁反常。以中證監一貫嘅霸氣，講一句：「你們洋鬼子懂甚麼，我們A股日均成交500億美元。」有咩問題？但今次嘅回應，有立場得來又有大國風範，反映中國人就算收三次好人卡，仍然非常恨入MSCI。佢最多只係喺側邊搵新華社做醜人，出咗份評論，話中國唔一定為入而入，都唔敢正面抽擊。

至於未來，相信中國會嚴格執行停牌新規，繼續放寬QFII，但求過咗海就神仙。

掌握財經生活資訊，即Like「蘋果ATM」fb專頁啦！
http://fb.com/appledailyatm