當年今日
關於我們

【真傷?】古天奴背傷續缺陣 高路普:冇新嘢好講

蘋果日報 2017/08/17 21:15

轉會利物浦高路普英超巴塞隆拿菲臘比古天奴

【新增動新聞】
利物浦嚟緊周末會出戰今季第二場英超對水晶宮,領隊高路普周四出席賽前記者會。被問到菲臘比古天奴的轉會風波,高路普強調冇嘢好講,冇嘢更新,剩係話古天奴背傷未好番,繼續唔踢得。
英國傳媒廣泛報道,巴西中場古天奴已經向利物浦交上轉會申請,要求球會俾佢轉投巴塞隆拿,但利物浦堅持唔放人。對於巴塞總經理施古拿透露,古天奴接近加盟巴塞,高路普話:「我唔知點解其他人講啲咁嘅嘢,亦唔知佢講乜,我又唔識佢,冇同佢見過面。我哋已經一早講晒要講嘅嘢,我冇新嘢好講。自從上次講完之後,我冇再收過新消息。」
高路普繼續話:「我哋唔係傻,當然知道情況好複雜,但真係冇新嘢好講。雖然我個人唔鍾意講大話,但要我講出百分百嘅真相都唔容易。不過,呢次真係冇新嘢好講。」講到古天奴嘅傷勢,呢位德國藉主帥話:「自從古天奴有背傷,佢就冇操過。我對此冇任何負面嘅意見。」
傾到仲有冇轉會嗰陣,高路普都係嗰句,冇新嘢好講,「唔好意思,我英文唔多好,唔能夠就同一條問題答到500個唔同嘅答案。就算假如轉會窗噚日閂咗,我哋都已經有支理想嘅團隊。轉會窗係重要,但最重要都係現有嘅團隊。」講到德國中場安利簡恩嘅續約情況,高路普亦都係話冇新進展。喺呢個記者會入面,最重要嘅新嘢,相信就係前鋒史杜列治可以復出對水晶宮。