雨傘運動遍地開花，更造就咗一個大紅人嘅出現，不過佢並唔係參與呢場運動嘅人士，而係警察公共關係科總警司、唔見咗一日之後今日終於再次現身嘅「4點鐘許Sir」許鎮德，佢嘅金句好似「或者我再重申一次」、「IwillnowrecapinEnglish」呢啲都已經無人不識，就連噚晚香港隊喺友賽贏新加坡2:1，三色台新聞主播伍家謙亦抽水一番，網民就大讚佢敢言，係良心主播。

話說噚晚港隊贏新加坡2:1嘅友賽，伍家謙喺報呢單新聞嘅時候一嚟就話「香港加油、香港隊都要加油」，似乎已經聽到一啲弦外之音。喺香港射入第一球之後，佢形容守門員舉雙手投降，讚港隊門將葉鴻輝展現永不放棄嘅拚搏精神，而喺港隊奠定2:1勝局之後，佢又話「或者我再重申一次」港隊係赢2:1，跟住仲話「容許我提提大家」，港隊下個禮拜仲有場國際賽。三色台畀人叫做CCTVB，不過伍家謙今次報體育手法就贏到唔少網民激讚，話佢係良心主播，甚至有人話總算對得住佢「死鬼老豆」伍晃榮，伍家謙今次真係「光宗耀祖」喇！

【雨傘革命】 http://umbrella.appledaily.com