當年今日
關於我們
隔牆有耳:賭王重注 買硬唐唐 - 李八方
蘋果日報 2009/07/11 06:00
設計對白
下屆特首跑馬仔雖然仍未入閘,但係晨操試閘好明顯已經開始咗,否則大家又點會見到話過N屆唔選嘅CY梁振英,近期忽然大舉出動。噚晚民建聯舉行12周年黨慶酒會,幾大特首熱門候選人:唐唐、鬍鬚曾同CY,難得同場現身亮相。又係嘅,嗰度計計埋埋可能有成百幾票,邊個會咁蝕底唔出現,主動將選票拱手相讓?
民建聯都好識做,安排三大熱門一齊上台主禮,盡量唔得失任何一位疑似未來特區揸fit人,以免最終押錯注就大鑊。唔少賓客都將注意力放喺呢三位男士身上,當中又以唐唐笑容最燦爛,唔知係咪因為覺得識上海話有優勢呢?鬍鬚曾就一貫木訥;CY亦較平時少咗啲笑容,可能因為勁敵當前大家都有啲緊張。
唔少台下嘉賓話,今次係CY近期忽然高調以嚟,三大熱門首次同台較量,都算係歷史性時刻。反而煲呔就冇乜人留意,傳媒集中火力追住幾位疑似特首候選人,唔知向來小器嘅煲呔會唔會有啲不是味兒呢?
八方本來都想聽吓三位熱門會唔會趁機表明心迹,可惜個個都急急腳走人。CY雖然有開口,但都係話呢啲嘢遲啲先傾,再次重申自己唔係近來先落區,似乎唔想咁快見光死。
呢個時候好彩有賭王何鴻燊,佢貫徹向來鍾意噏就噏嘅作風,大談心水。賭王話,佢買馬一向買熱門,連下屆特首都係睇好最熱門嗰個會跑出。佢最初唔肯講邊個係大熱,幾經追問先至話係唐唐,仲好大膽咁話同大家賭一鋪,十賠一買唐唐順利跑出。
賭王都刨過資料,話唐唐背景好,又做過唔同政府部門,熟悉政府運作,相信係最合適人選。至於CY,賭王嘅評語係「好古板」,似乎CY同肥媽玩煮飯仔呢招未能奏效。
講完香港再講澳門,賭王繼續力撐崔世安係澳門特首不二之選,大讚佢勤力,係真正澳門人,一定可以「澳人治澳」。雖然噚日有報道話崔世安嘅阿哥曾獲澳門政府低價批地,但賭王仍然話,做得特首就要斷六親,唔擔心事件影響崔世安施政喎。
mailto:
[email protected]