政圈近日不時流傳，話身為全國政協副主席嘅梁振英想回魂，好想再出嚟選特首。係真係假無人知，但傳到似層層，又難免嚇親人，最近甚至有個傳聞震驚人心，傳到梁振英想坐國務院副總理韓正個位咁，越傳越令人頭痕！

八方早前同某位建制中人傾開偈，話題不其然去到梁振英想回魂呢宗花生熱話。呢係建制中人聽完就擰擰頭，示意唔係真嘅，講真吖，八方個心頓時真係心定一定，點知佢繼而話：「你有冇聽過佢（梁振英）想坐韓正嗰位？」嘩，嚇死人咩，個心真係離一離。呀，唔係，係離十離先啱！

追問之下，該建制中人話喎，佢聽過挺梁嘅建制派講過，梁振英心繫大灣區，好想親手孕育呢個寶貝，而區區一個特首，梗係唔夠宏觀，直頭要「入常」主管港澳事務，先至可以真正高層次搞好大灣區。冇錯，講緊進入政治局常委，即係現時包括習近平、李克強、栗戰書、汪洋、王滬寧、趙樂際及韓正嘅七常委。

八方最初聽完真係笑咗出嚟，覺得咁傳法唔多唔少帶有喜感；但該建制中人好嚴肅咁叫八方，唔好只當笑話聽，指好多時梁營講咗啲似講笑嘅嘢，但最後都會成真㗎喎，例如當年唔少唐營中人都以為，「梁粉」話梁振英會闖關選特首係講笑，點知嚟真仲成真......聽到呢到，係咪越諗越心寒？再睇埋梁振英喺「反港獨」方面持續按習大大主意發炮，咦咦咦咦咦......不過呢，入常先要係共產黨，乜CY有認過咩？唔通洩露天機？

之不過咁，人人都想升呢，個個都升到呢咩；尤其政治局常委，點似爭特首咁簡單？暫時都係，聽下笑下先啦，君不見「梁粉」嘅諗法，有時確實同普通市民有落差，而造勢呢樣嘢，又無人會嫌多嘅！所以呢，「梁粉」陣營諗下無妨，做人有「大志」亦係好事，至於對外界而言，關於689嘅傳聞花生事，更加多多益善。

立會補選新聞，《蘋果》一網睇晒
http://bit.ly/appledaily1125