今日尾場因「軍事機密」閘前走甩致延遲開賽，呢匹馬後來捉番入閘照跑，不過一起步即大脫腳，未跑先輸最終更包尾而回，馬迷真金白銀投注化為烏有。其實「軍事機密」今次拋跌杜利萊走甩，擾攘咗好耐，就算當時如果着令佢退出畀馬迷重新投注，都夠晒時間有突，偏偏馬會班董事睇住佢空馬跑咗一大輪，氣力同情緒都大受影響，入閘後又不斷跳跳紮大發脾氣，根本完全唔適宜繼續參賽，但都畀佢照跑，咁嘅做法就好有問題嘞！競賽小組唔當機立斷，着令「軍事機密」退出，對投注咗此駒之馬迷好唔公平，投注人變成焗賭焗輸，試問大家條氣點會順？
對於愛駒做了眾矢之的，馬主羅傑承賽後雖對馬會決定表示尊重，但仍難掩失望之情。他說：「據我所知，賽後『軍事機密』處於極度憤怒及失落的狀態，情緒很不穩定。我同蘇偉賢傾過，我倆都尊重獸醫專業知識及馬會決定，不過彼此都同意若有得揀的話，便會為『軍事機密』選擇退出。」