Tesla唔造電動車，可以造乜呢？創辦人馬斯克（Elon Musk）畀大家估吓，今個月尾揭盅！馬斯克噚日喺自己Twitter度，約定大家今個月30號晚8點，話會喺加州霍桑嘅工作室發佈Tesla最新嘅產品。佢神神秘秘冇講新產品係乜東東，只係話唔係車，於是引起廣泛討論。
有科技網站分析，上月馬斯克話Tesla即將推出可以支持成間屋所需電量嘅電池，估計月尾都係講呢樣。
不過網民似乎唔信係咁簡單，馬斯克喎，俾人話係真人版《鐵甲奇俠》嘅馬斯克喎，冇啲驚喜點得呀？有人就估新產品係超級叉電器，可以將啤酒轉化為電力；有人估造完車要造直升機；有人甚至話可能係《大英雄聯盟》入面嘅醫療機械人「醫神」！只能夠話，網民嘅創意其實仲勁過馬斯克。