美股大漲，港股噚日朝亦唔執輸，高開105點，報14478，淡友見大市升至14520水平遇阻力，即大舉出擊，不過滙控（005）在120元有大量散戶買盤支撐，而中移動（941）在公布季度業績數據前呈強勢，結果淡友選擇力沽長和系，長實（001）及和黃（013）尾市走勢呈單日轉向，分別倒跌0.3%至81.30元及1.86%至73.90元。大市險些亦與長和系同一命運倒跌，恒指收市報14408，升幅收窄至36點。

禽流感淡友新藉口

禽流感或H5N1，阿虎近排喺新聞睇得多，但噚日都係首次聽到股市傳出有芬佬驚疫情爆發，因而減持股票轉持債券。事實上，03年沙士一疫，又的確令到區內經濟嚴重受損，香港更係重災區之一。專家話禽流感一旦變成瘟疫，災情會比沙士嚴重。不過在阿虎眼中，禽流感都未殺到香港，暫時唔使理佢住，不過就要提防成為淡友造淡新藉口。
電盈（008）旗下NOW電視月費低至5元，幾乎係送畀人睇，市場即時憂慮其收費電視業務是否有問題，股價逆市大跌3.64%至4.625元。
盈富基金（2800）快將派息，吸引食息一族追捧，成交罕有地激增至近2億元，不過有人話係對沖基金買貨，為期指淡倉進行對沖。盈富收報14.80元，升0.33%。盈富將於27日宣布派息，31日除息，11月22日股息可袋袋平安。
建設銀行（939）以接近上限2.35元定價，市場即傳出有人叫價2.70元沽出，暫時未知有冇人肯接。此外，亦有傳聞話先前限價以2.20-2.30元認購建行的基金，因為1股都分唔到，可能需要在二手市場掃貨。
阿虎