劉德華今日喺洲際酒店宣傳佢12月嘅演唱會，呢個活動仲成為咗一個35分小型演唱會，又唱歌又跳舞，仲有啲佢嘅經典片段睇。當中講到難忘畫面時，螢幕展示華仔曾經在演唱會中造型，包括小鳳仙、空中飛人、跳拉丁等，重點係難忘嘅爆褲相片，華仔形容：「係不可修補的裂縫。」自始後造褲會整闊啲。

唱完歌睇完經典畫面，華仔主動重提墮馬一事，佢話：「坐飛機返嚟香港畀一個氣泡包圍，一到香港之後，化妝師就俾四個口罩我，話啲人實會影你，你依家好醜樣。之後喺醫院過年廿八洗邋遢，一班護士長就話幫我洗頭抹身，資深幫我洗頭，junior就幫我抹身，但估唔到junior都六十歲。」

華仔開演唱會前，古仔拍咗段片話希望聽到華仔演唱神鵰俠侶歌曲，華仔今日現場找數，仲話：「驚演唱會上面唱就變咗老歌，依家找咗數，睇下佢會唔會嚟踩場。」另外螢幕展示華仔墮馬後康復期間撐拐杖照片，華仔話：「張相出咗之後，道好多人都模仿拎士的嘅相撐我，點知士的商就想趁呢個機問可唔可以長期合作，我呸，其實我哋搵sponsor好嚴格。」之後華仔多次謝謝贊助商，並親民同佢哋大合照結束活動。

華仔接受傳媒訪問時心情依然勁靚，問到佢演唱會有冇part 2，佢話：「跳完舞都有少少喘氣，o依家已經開始練習。」至於身體狀況係咪完全康復？華仔話：「喺醫學角度嚟講神經線破壞咗係唔能夠恢復，我腳趾尾有時會痺痺地，令我心情有啲煩，好似蛀牙咁。」並承認有嚴重創傷後遺症，對咩都有陰影，例如停車又驚後面架車撞埋嚟，但會樂觀面對。

過往華仔在演唱會中有好多飛天遁地場面，佢笑言：「今次淨係瞓喺度，會以安全為主，仲專登邀請咗人用耳機指揮，提住我走位，希望預多少少時間踩場，實在太耐冇做演唱會，想熟習啲。」嘉賓方面華仔歡迎大家自薦，仲話最好搵啲唱大戲。

至於囡囡係咪真係會嚟捧場，華仔話：「點知佢睇唔睇，問下佢先，唔好理我啦，好難正面一一解答各位。」另一位天王黎明都將囡囡相片展示上網，華仔話：「我唔會，唔習慣，自己都好少。」提議佢放全家福，華仔就話：「你哋唔使用激將法，我唔受呢套。」再追問佢太太同阿女係咪會嚟睇足廿場？華仔賣關子：「到時你哋睇下，不過阿女好少聽我嘅歌。」

精選娛聞，喺晒《娛果》
http://fb.com/appledailyent

精選娛聞，喺晒《娛果》
http://fb.com/appledailyent