香港航空近日負面消息一大籮，航班延誤屬等閒事，有地勤員工被旅客當沙包出氣。咁惡頂一班員工當然忍無可忍，發起集體請病假以抗議公司人手不足。之不過，寃豬頭都有盟鼻菩薩。
港航噚日參加機場職業博覽會，提供成800個職位空缺，當中有超過100個空中服務員空缺，竟然吸引咗唔少想做空少空姐嘅年輕人嚟排隊面試碰運氣，成為咗全場焦點。八方問過排隊嘅年輕人，佢哋嘅對答好似見工嘅標準答案咁，齊聲話唔擔心公司運作有問題，仲話入咗去做嘅話就會努力一齊做好佢。八方見班年輕人咁有心，惟有祝福佢哋入到去做嘅話，唔會好快變苦主咁出嚟哭訴公司點唔好啦。