「李氏力場」嚴重失靈，俾「韋哥」韋森特有機可乘，慢慢吹過嚟香港，仲越吹越勁，吹到十號波，港股噚日朝早停賽半日，李嘉誠亦頂唔住，長實（001）兩個喺將軍澳嘅樓盤──峻瀅同日出康城領凱，棚架同尼龍網吹到甩頭甩骨！

之前好多個颱風都怕咗李氏力場要兜路走，韋哥就冇有怕，吹到樹冧人跌，好多人返唔到屋企。李氏力場威力減弱，都唔知係咪同誠哥今年5月正式宣佈分身家，將上市王國交晒畀大仔李澤鉅有關，如果係咁，李澤鉅嘅功力明顯唔夠誠哥深厚。
有啲股民見小超人令李氏力場威力大減，即刻掉轉頭做嘢，走去買小小超李澤楷隻盈大地產（432），令到盈大晏晝開市無耐被乾夾18%，收市報1.96元，升8.3%。
一隻股無端端大升，點都要畀番個理由佢，有人就話盈大地產炒注資概念。先前誠哥話會出錢支持澤楷買佢鍾意嘅生意，雖則家冇聲氣，但市場就估定先，指小小超會將新生意注入盈大咁話喎！