英超球隊曼聯旋風式來港，噚晚仲喺香港大球賽同傑志對賽，結果曼聯以5比2勝出，好多球迷都對呢場賽事話收貨。賽事結束後，班球星就飛走咗啦，結束訪港之旅。

講到曼聯，就梗係要講下忠實粉絲李克勤o架啦，其實近日網民都好留意克勤有乜動靜，睇下佢今次會唔會送禮俾曼聯嘛!

自從佢05年7月將自己嘅CD封面，又加上「WelcometoHongKong」字樣嘅板框禮物送俾曼聯後，克勤曾以為份禮物會被放置於英國曼聯博物館，點知最後份禮物就俾曼聯棄置於更衣室內。呢件事至今仍然被網民笑爆，原來已經成8年啦.....

雖然愛隊訪港，但克勤微博意外地冇乜動靜，仍然係維持喺噚晚關注大球場爛地事件上面，不過網民又點會放過佢，又有人創意改圖，將近日是非纏身，早前一邊報曼德拉病危新聞，一邊喊緊嘅黃紫盈圖片惡搞，變成「八年後克勤送禮再次被棄於更衣室」，真係抽水抽到乾晒塘。

雖然有網民話:「仲要抽到幾時呀?」不過大部份網民都係笑爆，証明佢哋仲未厭.....會唔會玩到2046o架?