「有樓女」賴彥妤（Vivienna）早前同男友去咗台灣自駕遊，點知其間發生車禍，好彩傷勢唔算嚴重，但係全車翻側，車頭盡毀，佢哋事後向租車公司繳付1.3萬元新台幣(約3,385港元)賠償同拖車費，仲應承咗會賠償架車喺維修期間嘅營業損失，合共4萬元台幣(約10,417港元)，不過Vivienna同男友返港後玩失踪，租車公司一直搵唔到佢哋，結果就將呢件走數事件擺咗上fb。

噚晚Vivienna喺觀塘為網台錄影節目，講到同租車公司糾紛，佢話：「嗰日我同男友最後一日喺台灣旅行，點知撞咗埋山，當時租車公司都有派人了解，我哋即場都俾咗部份錢，不過因為佢哋講唔到要幾錢，諗住佢架車買咗全保，所以咪返香港再俾咗律師處理，因為長假期處理唔到，點知租車公司人肉搜尋！」

Vivienna仲話：「我自己都好驚，仲有啲嬲，我唔係不顧而去，成件事係一個誤會，最後知道要賠4萬台幣，我都即刻匯錢過去，租車公司話係和解費，對方澄清咗。成件事我都要負番責任，我都希望可以理性解決，錢可以搵，但係名聲冇咗就唔可以，我絕對冇走數。」

精選娛聞，喺晒《娛果》
http://fb.com/appledailyent